Job 42

UJobe uyaphendula

1 UJobe wasemphendula uJehova wathi:

2 “Ngiyazi ukuthi ungazenza zonke izinto; kalikho icebo lakho elingavinjelwa.

3 Ubuzile wathi, ‘Ngubani lo ovala iseluleko sami engelalwazi na? Ngeqiniso ngikhulumile ngezinto ebengingazizwisisi, izinto ezimangalisayo engingeke ngizazi.

4 “Wena uthe, ‘Lalela manje, mina ngizakhuluma; ngizakubuza, wena uzangiphendula.’

5 Izindlebe zami zasezizwile ngawe kodwa manje amehlo ami asekubonile.

6 Ngakho sengizeyisa, sengiphenduka ngizilahla othulini lasemlotheni.”

Isiphetho Sendaba

7 Kwathi uJehova esetshilo lezizinto kuJobe wathi ku-Elifazi umThemani, “Ngikuzondele wena kanye labangane bakho bobabili, ngokuba kalikhulumanga ngami okulungileyo njengenceku yami uJobe ekhulumile. 8 Yikho manje thathani izinkunzi eziyisikhombisa lezinqama eziyisikhombisa liye encekwini yami uJobe liyokwenza umhlatshelo wokutshiswa owenu lina. Inceku yami uJobe izalikhulekela, mina ngizawamukela umkhuleko wayo ngingaze ngalijezisa okufanele ubuthutha benu. Kalikhulumanga ngami okulungileyo njengenceku yami uJobe ekhulumile.”

9 Ngakho u-Elifazi umThemani, uBhilidadi umShuhi loZofa umNamathi benza lokho abakutshelwa nguJehova; njalo uJehova wawemukela umkhuleko kaJobe.

10 UJobe esebakhulekele abangane bakhe, uJehova wamenza waphumelela njalo wamupha okunengi okuphindwe kabili kwalokho ayelakho kuqala. 11 Bonke abafowabo labodadewabo kanye lobani owayemazi ngaphambili weza ukuzakudla laye endlini yakhe. Bamkhalela, bamzwela ngakho konke ukuhlupheka uJehova ayemehlisele khona, kwathi ngulowo lalowo wamupha ulutho lwesiliva kanye lesongo legolide.

12 UJehova wayibusisa impilo yokucina kaJobe okudlula eyokuqala. Waba lezimvu eziyizinkulungwane ezilitshumi lane, izinkulungwane eziyisithupha zamakamela, inkulungwane yezinkabi ezibotshwayo labobabhemi abayinkulungwane.

13 Waphinda njalo waba lamadodana ayisikhombisa lamadodakazi amathathu.

14 Indodakazi yokuqala wayetha ibizo elithi Jemima, eyesibili uKheziya, eyesithathu yaba nguKhereni Haphutshi. 15 Kakuzange kube khona elizweni lonke abesifazana ababebahle njengamadodakazi kaJobe, njalo uyise wawabela ilifa kanye labanewabo.

16 Ngemuva kwalokhu uJobe waphila iminyaka elikhulu lamatshumi amane; wababona abantwabakhe labantwababo kwaze kwaba yisizukulwane sesine. 17 Ngakho-ke wafa, esemdala njalo eseluphele.